Toj.su
Ааввалин кӯшиши яктопарастӣ, ки барои шинохти масири таҳаввули шуури динии инсон муҳим аст, дар Миср карда мешавад. Ин кӯшиш дар замони салтанати Амонҳутап (ё худ Амонфис) – и IV, ки дар асри XVI қабл аз мелод мезистааст, карда шуда буд.
Ӯ пас аз як муддати ба сари ҳокимият омадан кӯшидаст, ки парастиши Амон, Птоҳ ва дигар худоёни мӯътабари Мисриро барҳам занад. Вай як худоиягонае бо номи Атон – худои Офтобро барои ҳама ҷорӣ кард. Фиръавн Амонҳутап IV номи худро низ ба ин муносибат иваз намуда Эхнотун (хости Атун ё бандаи Атун) номид ва пойтахти наве ба номи Ахетатун (осмони Атун) бунёд кард, ки то дар номи шаҳр низ номи худо бошад. Ин шаҳр ва Маъбади Атун ҳоло Тел-ал-Амарна ном дорад.
Аммо ин ислоҳи Эхнотун муваффақият пайдо накард. Баъд аз вафоти ӯ худову парастишҳои кӯҳна аз нав барқарор ва номи фиръавни муслиҳ ба куфру бидъат лаънат карда шуданд. Мисриён, чунон ки дидем, худоёни бисёре доштанд вале аз байни ин ҳама худоёне буданд, ки бештар маъруф ва муқаддас буданд .
