Дуоҳои вақти дохил шудан ба масҷид

Вақте ба масҷид дохил мешавад, ба пои рост дохил шавад ва сипас «Бисмиллоҳ» гуфта, ба Паёмбар (с) дуруд бифиристад ва ин дуоро бихонад:«Аллоҳумма-фтаҳ лӣ абвоба раҳматика».
«Худоё! Дарҳои раҳмататро ба рӯйи ман бикушо». .
Ҳазрати Абдуллоҳ ибни Умар (р) ривоят мекунад, ки Паёмбар (с) ҳар вақте дохили масҷид мешуд, ин дуоро низ мехонд:
«Аъузу биллоҳи-л-ъазим ва биваҷҳиҳи-л-карим ва султониҳи-л-қадим мина-ш-шайтони-р-раҷим».
«Ба Худованди бузург ва рӯи гиромӣ (ки лоиқи ҷалоли Ӯст) ва қудрати қадим ва азалии Ӯ аз бадии шайтони рондашуда паноҳ мебарам».
Шахсе ин дуоро бихонад, Худованд ӯро тамоми рӯз аз бадии шайтон ҳифозат мекунад.