Ҳайбат ва виқори Имом Молик (р)

Аз сифоте, ки Худованд ба Имом Молик бахшида буданд ва дар ахбору ривоёт нақл шуда, ҳайбат ва виқори вай мебошад. Халифа Ҳорунуррашид мегўяд: «Дар байни уламо ҳеҷ кас боҳайбаттар аз Молик ва бо тақвотар аз Фузайл ибни Иёз надидаам». Саъид ибни Марям мегўяд: «Боҳайбаттар аз Молик надидаам, то он ҷое, ки боҳайбаттар аз ҳоким буд».
Зиёд ибни Юнус мегўяд: «На олиме ва на обиде ва на дузде ва на амире боҳайбаттар аз Молик надидаам».
Имом Шофеъӣ мегўяд: «Аз ҳеҷ кас ҳамонанди Молик дар ҳангоме ки ба ў нигоҳ мекардам, натарсидаам». Ў мегўяд: «Суфёни Саврӣ дар маҷлиси Имом Молик буданд, замоне ки эҳтироми мардум ба Имом Молик ва эҳтироми Имом Молик ба илмро дид, ин шеърро суруд:
Яъбал-ҷавоба фало юроҷаъу ҳайбатан,
Адабул-вақори ва ъиззу султонит-туқо.
Вас-соилуна навокисул-азқонӣ,
Фаҳувал-маҳибу ва лайса зо султонӣ».